انصار:( د لړم ۴ مه) د ټولیز امنیت د تړون سازمان د سرمنشي مرستیال والري سمریکوف ادعا کوي، چې له افغانستانه د دغه تړون غړو هېوادونو ته نشه يي توکي قاچاق کېږي.
نوموړي د بلاروس په مېنسک ښار کې د دغه سازمان له لوري د نشه يي توکو د قاچاق پر وړاندې د مبارزې د همغږۍ د ۵مې غونډې په څنډه کې وویل:«د هېوادونو مشرانو دغه پروګرام تصویب کړی او موږ به یې پر پلي کولو پېل وکړو. زه فکر کوم چې دغه پروګرام به ډېره اغېزه او ګټه وکړي.» هغه په دې اړه نور جزییات نه دي ورکړي.
بل لور ته، د طالبانو د رژیم ویاند ذبیح الله مجاهد په دې اړه شوې ادعاوې ردوي او وایي چې په دې تړاو د دوی خلاف تبلیغات کیږي.
د منځنۍ اسیا هېوادونو ته د نشه يي توکو د قاچاق په تړاو اندېښنې داسې مهال زیاتېږي چې د طالبانو له بیا واکمنېدو وروسته، د نشه يي توکو کرکېله، پېر او پلور منعه اعلان کړل.
یو شمېر نړیوالو بنسټونو د نشه یي توکیو پر وړاندې د طالبانو د هڅو ستاینه کړې، خو ځینو سیمه ییزو هېوادونو بیا ویلي چې لا هم د دوی قلمرو ته له افغانستان څخه د نشه یي توکیو د قاچاق ادعاوې کوي.
URL تعقيب: https://www.ansarpress.com/pashto/28027
